طالب من الجامعة الهاشمية يرد على زميلته التي تمحورت أمنياتها على صورة مع الملك

العالم الآن – رد طالب من الجامعة الهاشمية على كلمة لزميلته أثناء زيارة جلالة الملك يوم أمس حيث تمحورت أمنيات الطالبة حول صورة تأخذها مع جلالة الملك وزيارة لقصره ما جعل هذا الطالب يرد على زميلته شارحاً وضعه الدراسي والاجتماعي … وتالياً رد هذا الطالب ….

بيجي الملك يزور جامعتي الي ضيعت من عمري ٥ سنين فيها وأنا للللانmان مش قادر اتخرج لاني مُجبر اني اشتغل وادرس وأأجل فصول كثير من حياتي عشان الحياة في هالبلد بتتطلب منك هيك اي اشي بدك تعمله لازم تعاني فيه … مش مهم عادي انا موافق وراضي في هالحياة لانها مش عليّ بس لأ هي ع كل شباب البلد !

بس في زيارة ملك البلاد المُفدّى لما تختاروا طلاب يحكو بإسم الطلبة اجمعين لا تختاروا بنت تحكي انا في عندي ٣ طلبات نفسي يتحققوا وهم ؛
– اتصور معك
-وازور قصرك
-وتزورني كمان مره
* ويسعد قلبك !

عشان انا طلباتي مش هيك ، انا نفسي اعيش او بلاش اعيش بس لما اموت ما اموتش من الجوع 💔

انا نفسي اموت وانا انسان محقق كامل رغباتي في الحياة او حتى جزء منها انا نفسي اموت وانا انسان مش عبد منهك الحال !

يا جلالة سيدنا المُفدّى هذول الطلاب الي اختاروهم اختاروهم يحكوا بإسمي لانه معدلاتهم عاليه مش لانهم كويسين .. هذولا في منهم منافقين يا سيدنا !

انا ما بدي اتصور معك لانه صورتي مش حلوه … وجهي اسود من الهموم ومن الجوع !

ولا بدي ازور قصرك لانه اذا بدي اجي بتاكسي عالقصر بضلش معي مصاري اداوم ثاني يوم عالجامعة 💔

انا معدلي ٢ ومعي انذار بس انا بعرف اطالب بحقي وبعرف اكون زلمه قدام الرجل الاول في البلد … ما بعرفش امسك مايكروفون واغني واحكي شعر 🙂
#ثابت_قواقنه